СЕКСЕУІЛДІ НЕГЕ СЕЛДІРЕТІП АЛДЫҚ?

Егілген тұқым неге өнбейді? Миллиондап қаржы жұмсалған сексеуілді көктету жұмысы шатқаяқтап тұр. Сарысу және Қосқұдық орман шаруашылықтарында биыл егілген өскіннің көбі қурап кетіпті. Неге ? Орманшылардың айтатын сылтауы бір: Ауа райының қолайсыздығы, қолға алған жұмыстың жылдағыдан ауқымдылығы. Көтере алмайтын шоқпарды белге байлап, екі қолы ышқырында жүрген орманшыларға қандай шара көрілуі керек? Облыс әкімінің орынбасары Қанатбек Мәдібектің төрағалығымен өткен кеңесте осы мәселелер қаралды. Сонымен қатар, табиғи ресурстар және табиғат пайдалануды реттеу басқармасының жыл ішінде атқарған жұмысы сараланып, табиғи орман қорларын қорғау және жабайы аңдардың өсу барысы сияқты бірқатар мәселе талқыланды.