ПОЛИЦИЯ ҚЫЗМЕТКЕРЛЕРІНЕ АЛҒЫС БІЛДІРДІ
Сарысу ауданының Жаңатас қаласында тұратын 5 жасар Жансерік болашақта өз өмірін полиция қызметімен байланыстырып, қылмыспен күресуді армандайды. Бұл туралы ол емделуге ақша жинауға көмектескен қоғам белсенділеріне айтқан. Сарысу аудандық полиция бөлімінің басшылығы ол бейнежазбаны әлеуметтік желілерде көріп, баланы қуантуға шешім қабылдаған. Сарысу ауданының полиция бөлімінің бастығы Болат Айтжанов, оның бірінші орынбасары Қанат Нарбеков кішкентай балақайдың үйіне барды. Олар ойыншықтар, тәттілер, полицияның жезл таяғы және өз фуражкасын сыйға тартты. Жансерік полицейдің қалпағын киіп, қолына жезл ұстап, өзін жол полициясы қызметкерінің орнына таныстырып, қонақтармен бірге жол қозғалысы ережелерін жаттады. АПБ бастығы зор денсаулық, оқуда табыс тілеп, балақайдың анасы Жансаяға ұлының полиция қатарында қызмет етуге деген ұмтылысын қолдағаны үшін алғыс айтты. Баланың анасы полиция басшылығына көңіл бөліп, қолдау көрсеткені, баласының арманын орындағаны үшін алғыс білдірді.
